Наша цёплая, шумная, розная каманда Жывой Бібліятэкі заўжды шукае новых сябраў!

Мы – гэта супольнасць людзей, якія не любяць стэрэатыпы і пагэтаму вядуць з імі барацьбу праз пашырэнне і ўзмацненне камунікацыі паміж людзьмі.

Мы прымаем у сваю каманду вельмі розных людзей і мала на што пры гэтым звяртаем увагу, але гэта не значыць, што у нас зусім няма патрабаванняў. Мы чакаем ад вас:

• павагу да правоў чалавека і разнастайнасці грамадства,
• жаданне даведацца больш пра працу арганізацыі,
• веданне нашага фармату “Жывая Бібліятэка” (альбо моцнае жаданне даведацца пра яго),
• здольнасць хутка вучыцца,
• адказнасць,
• павагу да дэдлайнаў і здольнасць іх прытрымлівацца,
• звышздольнасць “не знікаць” з жыцця арганізацыі.

Таксама вам патрэбна мець дастаткова часу, каб займацца абраным накірункам дзейнасці. Усё астатняе не мае значэння і не будзе ўлічвацца пры адборы.

Што вы можаце і што патрэбна нам:

• Арганізоўваць мерапрыемствы ў Мінску і часам дапамагаць з арганізацыяй у іншых гарадах. Трэба проста добра ведаць усе стадыі падрыхтоўкі, выконваць іх, нагадваць іншым пра дэдлайны і не забываць пра свае.
• Шукаць і запрашаць новых “жывых кніг”. Гэта ледзьве не галоўнае ва ўсім працэсе падрыхтоўкі фармата “Жывой Бібліятэкі”. Трэба мець вельмі добрыя камунікатыўныя здольнасці, не баяцца размаўляць з незнаёмымі людзьмі, умець проста тлумачыць складаныя рэчы, не забываць неабходныя рэчы, сачыць за выкананнем просьбаў. Цярплівасць і спакой таксама будуць да рэчы.
• Адкзаваць за напаўненне сайту і падтрымку яго ў актуальным стане. Займацца рассылкай навінаў для нашых падпішчыкаў у MailChimp.
• Весці ФБ-старонку арганізацыі. Паглядзіце як мы робім гэта зараз і зрабіце лепш. Патрэбна 3-5 пастоў на тыдзень пра нас і нашых сяброў ды партнэраў. Вельмі важна рабіць гэта па-беларуску!
• Каардынаваць каманды ў іншых гарадах. У нас іх ужо не мала: Гродна, Берасце, Віцебск, Маладзечна, Бабруйск. Дзесьці ўжо спрацаваныя каманды, дзесьці не – трэба падтрымліваць іх кансультацыйна і інфармацыйна, дапамагаць шукаць новых людзей і пашыраць лакальныя сувязі. Трэба добра ведаць наш фармат і спецыфіку гарадоў.
• Дапамагаць з усім астатнім. Нашыя валанцёры могуць займацца разнастайнымі рэчамі ад піяру да дызайну, фатаграфаваць, пісаць, вычытваць тэксты, ствараць новае, руйнаваць старое – глядзіце падрабязней у Google-форме.

Далучыцца да нашай каманды зараз вельмі проста – трэба запоўніць акету па спасылцы альбо ніжэй.