Арганізаваць Жывую Бібліятэку

Вітаем вас на старонцы для арганізатараў і арганізатарак фармату Жывой Бібліятэкі!

Знешне Жывая Бібліятэка выглядае вельмі проста. З-за гэтага фармат карыстаецца ўсё большым попытам у беларускіх ініцыятыў і арганізацый. Але каманда Цэнтра развіцця эфектыўнай камунікацыі “Жывая Бібліятэка”, маючы больш за 5 гадоў досведу арганізацыі фармату ў розных гарадах Беларусі, з упэўненасцю можа сказаць, што гэта зусім не так!

Знайсці правільнае памяшканне, адшукаць Жывыя Кнігі, патлумачыць ім, што будзе адбывацца, распаўсюдзіць інфармацыю, падрыхтаваць усе неабходныя дакументы… У новага арганізатара ці арганізатаркі на практыцы гэта выклікае хвалю праблем і пытанняў. Таму мы рады падзяліцца нашым досведам – каб вы маглі правесці сваё першае і ўсе наступныя мерапрыемствы прыемна і карысна для ўсіх бакоў.

На гэтай старонцы сабрана ўсё неабходнае для будучага арганізатара і арганізатаркі:

1. Пад гэтым тэкстам вы знойдзеце дапаможнік “Жывая Бібліятэка: дапаможнік па арганізацыі мерапрыемства”, які каардынатаркі праекту Марына Штрахава і Марыя Лукашук напісалі напрыканцы 2017. Гэты дапаможнік адмыслова напісаны для чалавека, які загарэўся ідэяй зрабіць Жывую Бібліятэку, але не ведае, з чаго пачаць і што наогул для гэтага патрэбна. Яго можна прачытаць на сайце, спампаваць альбо папрасіць у нас яго папяровую версію.
2. У правым слупку вы знойдзеце ўсе неабходныя для падрыхтоўкі і правядзення Жывой Бібліятэкі формы дакументаў і спасылкі на розныя анкеты, якія спрашчаюць нашае жыццё. Спіс будзе дапаўняцца са з’яўленнем новых карысных дакументаў.
3. Акром таго ў правым слупку таксама ёсць шэраг карысных спасылак. Можна больш даведацца пра мову варожасці, арганізаваць экапрыязную Жывую Бібліятэку і іншае.

У любым выпадку перад тым як праводзіць мерапрыемства раім вам абавязкова звязацца з намі. Мы з’яўляемся афіцыйнымі прадстаўнікамі фармату Human Library у Беларусі і праз гэта нясём адказнасць за якасць мерапрыемстваў, якія ладзяцца ў нашай краіне. Мы заўжды рады дапамагчы ўсімі дасяжнымі нам сродкамі тым, хто хоча праводзіць Жывыя Бібліятэкі ў сваім горадзе ці вёсцы. Чакаем вашых паведамленняў! Па пытаннях супрацы можаце пісаць на пошту, праз форму зваротнай сувязі альбо звяртацца да каманды ў сацыяльных сетках.