Зараз нашая каманда складаецца з 7 арганізатараў і каля 15 валантэраў, якія дапамагаюць нам рыхтаваць і праводзіць усе мерапрыемствы. У нас вялікая і вельмі дынамічная каманда, якая ўвесь час змяняецца, шукае сябе і імкнецца стаць яшчэ лепш!

Каманда 1


Марына Штрахава. Каардынатарка праекту.

“Жыве” з фарматам Жывой бібліятэкі больш за 4 гады. Яна пазнаёмілась з ім у красавіку 2012 у адной з бібліятэк Вроцлава (Польшча) пад час праекту “Study Tours To Poland”. Праз 2,5 гады рэалізавала гэты фармат у Беларусі. Марына жыве фарматам, які ўплывае на яе жыццё не меньш, чым яна ўплывае на фармат. Верыць у тое, што праект закладае добры падмурак для пазітыўных зменаў у грамадстве. Беларускамоўная, есць мяса, любіць змешваць розныя гатункі гарбаты, не ўяўляе раніцу без кавы, любіць падарожнічаць. Мізантроп, які збегам абставін любіць людзей. Заўжды адкрыта да ўсяго новага. Бясконца любіць свабоду і лічыць, што ў кожнага ёсць права быць Іншым і ніхто не можа нас яго пазбавіць.

Марыя Лукашук. Су-каардынатарка, адна з заснавальніц праекту.

Пазнаёмілася з Жывой Бібліятэкай ва Ўкраіне ў 2013 і адразу закахалася. За гады ўзаемаадносін з фарматам ужо паспела выканаць усё ролі і зразумець, што Бібліятэкару складаней за ўсіх! Бібліятэкар шукае цікавых Кніг, а потым не можа з імі размаўляць бо займаецца арганізацыяй. Карацей, Марыя – чалавек  эмацыйны, які захапляецца новымі ідэямі кожны тыдзень і шукае натхненньне ў бясконцых вандроўках. Бо за мяжой жа столькі новых цікавых людзей! Імкнецца зразумець кожнага, але не заўсёды разумее сябе. Яе самым вялікім захапленнем з’яўляюцца танцы, розныя стылі ды іх гісторыя. Аддала гэтаму мастацтву некалькі пяцелетак свайго жыцця і хоча аддаць яшчэ. Самым важным у жыцці лічыць справядлівасць і ўнўтраныя прынцыпы чалавека, бо толькі гэта можа прывесці нас да грамадства, дзе нам будзе не сорамна жыць. Марыць пра двух вялікіх сабакаў і ўрэшце рэшт знайсці асабістую раўнаўвагу.

Воля Арцёмчык. У мінулым адна з заснавальніц і арганізатарак праекту.

Зараз у жыцці супольнасці не ўдзельнічае і займаецца іншымі не менш цікавымі праектамі. Упершыню пазнаёмілася з Жывой бібліятэкай у Даніі, дзе была ў камандзе ЖБ і паралельна кнігай. Беларускую Жывую Бібліятэку лічыць адной з самых крутых падзей, якія здараліся ў яе жыцці. Кажа, што атрыманы досьвед арганізацыі Жывых Бібліятэк і працы ў камандзе адмыслова паўплываў не толькі на яе прафесійныя навыкі, але і змяніў яе адносіны да так званага “першага ўражання”. Кажа, што перадусім павінен быць асабісты досьвед. Таму паслухай меркаванне інша_га_й, прымі да ўвагі, але паспрабаваць маеш сам_а. Любіць чырвоную памаду, займаецца тайскім боксам, пячэ смачны пірог з морквы, марыць з’ехаць у Грузію. Лічыць каўчсёрфінг лепшым спосабам даведацца пра звычкі мясцовых жыхароў.

Ганна Марзан. Адказвае за працу з валантэрамі. 

Прыйшла ў каманду ў жніўні 2015 года. Пачынала як валанцёр-фатограф, але неўзабаве стала адной з арганізатарак Жывых бібліятэк. Не мае ілюзій наконт таго, што стэрэатыпаў не стане зусім, але марыць пра тое, каб любы чалавек загадзя не ставіўся негатыўна да Іншых, адрозных ад яго людзей. Прымае Іншых не па колеры скуры, веравызнанні, сэксуальнай арыентацыі, прафесіі, гендару і ўзросце, а паводле іх учынкаў. Лічыць, што ў любой сітуацыі трэба заставацца Чалавекам. Любіць падарожнічаць, хадзіць у паходы, чытаць, пазнаваць і спрабаваць новае, фатаграфаваць. Сацыянічны тып – сапраўдны Драйзер. Не заўсёды добрая, але справядлівая. Умее смяяцца над сабой.

Ганна Платніцкая. Адказвала за працу з валантэрамі, цяпер працуе з базай кніг.
У каманду Жывой Бібліятэкі прыйшла праз год пасля старту праекта падчас Тыдня Студэнта ў лістападзе 2015 года, спачатку як валантэрка, а пасля ўжо і як арганізатарка. Упэўнена, што цэтлікі для рэчаў, а не для людзей. Лічыць, што Жывыя Бібліятэкі, акрамя разбурэння стэрыатыпаў, з’яўляюцца цудоўным варыянтам нефармальнай адукацыі. У звычайным жыціі яна студэнтка-медык, займаецца тайскім боксам. Любіць і верыць у людзей, але аддае перавагу магчымасці пабыць адной. У жыцці прытрымліваецца фразы Гандзі: “Будзь тым змяненнем, якое хочаш бачыць у жыцці”.
Віка Парэчына. Арганізатарка.

Далучылася да каманды ў 2015 годзе. Пазнаёмілася з фарматам “Жывой Бібліятэкі” на моладзевым праекце ў Гішпаніі і адразу ж праніклася гэтай ідэяй, таму з задавальненнем далучылася да ўжо існуючай каманды арганізатара_к у Беларусі. Фаталіст. Лічыць, што не бывае дрэнных ці нецікавых людзей. Верыць, што ўсё ў жыцці вяртаецца да чалавека. Цікавіцца тэмай інклюзіі ў Беларусі. Упэўнена, што ўдзел у жыцці НДА – адно з лепшага, што можа здарыцца з моладдзю і студэнтамі і сур’ёзна паўплываць на светапогляды ў далейшым. Успрымае Жывую Бібліятэку не толькі як спосаб скасаваць стэрэатыпы, але і як выдатнейшы шанец для “Чытачоў” пашырыць свой кругазор у тых напрамках, пра якія яны ніколі нават не думалі.

Улад Саўко. Арганізатар.

Упершыню наведаў Жывую бібліятэку ў сакавіку 2016 году ў межах фестываля КВІР-культуры Дотык, на які зусім не хацеў ісці. Пад моцным уражаннем ад убачанага і пачутага вырашыў далучыцца да нашай каманды. Перфекцыяніст, цынік і сацыяпат. Удзел у арганізацыі Жывых Бібліятэк дапамагае яму будаваць зносіны з незнаёмцамі, трываць чужыя дзівацтвы і правільна крытыкаваць чужую працу. Лічыць, што фармат Жывых Бібліятэк вучыць, калі не прымаць, то хаця б адэкватна ўспрымаць “Іншых” людзей.

Зміцер Радзіеўскі. Арганізатар.

Студэнт, работнiк сферы продажаў, па адукацыі металург. Доўгі час працаваў над уласнай адкрытасцю навакольнаму свету і людзям, у выніку дасягнуўшы посьпеху. Таму лічыць, што пры жаданні гэтага можа дасягнуць кожны, а Жывая Бібліятэка – адзін са зручных і дасяжных «інструментаў» на гэтым шляху. З фарматам праекту пазнаёміўся ў жніўні 2016 года. На першае мерапрыемства патрапіў у выніку доўгіх пошукаў бясплатных мерапрыемстваў на Facebook. Заяўку на валанцёрства падаў адразу ж, але патрапіць у каманду змог толькі пасля асабістага знаёмства з каардынатаркай праекта. На дадзены момант з’яўляецца адным з арганізатараў, працуе з валантэрамі ў тэхнічным напрамку. Лічыць, што любыя погляды маюць месца быць. Задача чалавека прыняць той факт, што кожны мае права на сваё меркаванне, і да гэтага меркавання трэба ставіцца з павагай.

Лера Чыгір. Арганізатарка.
Дар’я Галавашка. Арганізатарака, нашая экспертка па SMM.
Падзяліцца: